ಜೋಯಿಡಾದ ಬಾಮಣಗಿ ಗ್ರಾಮದಲ್ಲಿ ಐದು ಕಾಲಿನ ವಿಚಿತ್ರ ಕರುವೊಂದು ಜನ್ಮ ತಾಳಿದ್ದು, ಸಾರ್ವಜನಿಕರಲ್ಲಿ ತೀವ್ರ ಕುತೂಹಲ ಹಾಗೂ ಅಚ್ಚರಿ ಮೂಡಿಸಿದೆ. ಗ್ರಾಮದ ಪ್ರಗತಿಪರ ರೈತ ಪರಶುರಾಮ ಗೌಡ ಅವರಿಗೆ ಸೇರಿದ ಹಸು ಈ ಗಂಡು ಕರುವಿಗೆ ಜನ್ಮ ನೀಡಿದೆ. ಸಾಮಾನ್ಯವಾಗಿ ಇಂತಹ ಅಂಗವೈಕಲ್ಯ ಅಥವಾ ದೈಹಿಕ ಬದಲಾವಣೆಗಳಿದ್ದಾಗ ಹಸುಗಳು ಜನ್ಮ ನೀಡಲು ಪಡುವ ಕಷ್ಟ ಅಷ್ಟಿಷ್ಟಲ್ಲ. ಆದರೆ, ಯಾವುದೇ ವೈದ್ಯಕೀಯ ನೆರವು ಇಲ್ಲದಿದ್ದರೂ ಹಸು ಯಾವುದೇ ತೊಂದರೆಯಿಲ್ಲದೆ ಅತ್ಯಂತ ಸುಲಭವಾಗಿ ಕರುವಿಗೆ ಜನ್ಮ ನೀಡಿರುವುದು ಎಲ್ಲರ ಆಶ್ಚರ್ಯಕ್ಕೆ ಕಾರಣವಾಗಿದೆ.
ಜೋಯಿಡಾ ತಾಲ್ಲೂಕಿನ ಗ್ರಾಮೀಣ ಭಾಗಗಳಲ್ಲಿ ಇಂದಿಗೂ ಹೈನುಗಾರಿಕೆ ಮತ್ತು ದನಗಳ ಸಾಕಾಣಿಕೆ ಸಾಂಪ್ರದಾಯಿಕವಾಗಿಯೇ ಹೆಚ್ಚಾಗಿ ನಡೆಯುತ್ತಿದೆ. ಪಶು ವೈದ್ಯರ ಕೊರತೆಯಂತಹ ಹತ್ತಾರು ಸವಾಲುಗಳ ನಡುವೆಯೂ ಇಲ್ಲಿನ ರೈತರು ಹೈನುಗಾರಿಕೆಯನ್ನು ಜೀವಂತವಾಗಿಟ್ಟಿದ್ದಾರೆ. ಸದ್ಯ ಜನ್ಮತಾಳಿರುವ ಈ ಗಂಡು ಕರುವಿನ ಉಳಿದೆಲ್ಲ ದೈಹಿಕ ಅವಯವಗಳು ಮತ್ತು ಆರೋಗ್ಯ ಸ್ಥಿತಿ ಸಂಪೂರ್ಣವಾಗಿ ಸದೃಢವಾಗಿದ್ದು, ಹೆಚ್ಚುವರಿ ಒಂದು ಕಾಲು ಮಾತ್ರ ಬೆನ್ನಿನ ಮೇಲ್ಭಾಗದಲ್ಲಿ ವಿಚಿತ್ರವಾಗಿ ಮೂಡಿಬಂದಿದೆ.
ಬೆನ್ನಿನ ಮೇಲೆ ಕಾಲು ಹೊತ್ತು ಹುಟ್ಟಿದ ಈ ಅಪರೂಪದ ಕರುವಿನ ಸುದ್ದಿ ತಿಳಿಯುತ್ತಿದ್ದಂತೆ ಸುತ್ತಮುತ್ತಲಿನ ಹಳ್ಳಿಗಳ ಜನ ಈ ವಿಸ್ಮಯವನ್ನು ನೋಡಲು ಪರಶುರಾಮ ಗೌಡ ಅವರ ಮನೆಗೆ ಧಾವಿಸುತ್ತಿದ್ದಾರೆ. ಅದರಲ್ಲೂ ವಿಶೇಷವಾಗಿ ಮಕ್ಕಳಿಗೆ ಈ ಕರು ಒಂದು ಅಪರೂಪದ ಕೌತುಕದಂತೆ ಭಾಸವಾಗುತ್ತಿದೆ. ಸದ್ಯ ತಾಯಿ ಹಸು ಹಾಗೂ ಐದು ಕಾಲಿನ ಕರು ಎರಡೂ ಸಂಪೂರ್ಣವಾಗಿ ಆರೋಗ್ಯವಾಗಿವೆ ಎಂದು ಮಾಲೀಕರು ತಿಳಿಸಿದ್ದಾರೆ.
