ಕಾರವಾರ: ಕರಾವಳಿಯ ಯುವಕರಲ್ಲಿ ದೇಶಸೇವೆಯ ಜಾಗೃತಿ ಮೂಡಿಸುತ್ತಿರುವ ಕಾರವಾರದ ಐತಿಹಾಸಿಕ ಮಾಲಾದೇವಿ ಮೈದಾನವು ಇದೀಗ ಮತ್ತೊಂದು ಹೆಮ್ಮೆಯ ಕ್ಷಣಕ್ಕೆ ಸಾಕ್ಷಿಯಾಗಿದೆ. ಇಲ್ಲಿನ ಉಚಿತ ದೈಹಿಕ ತರಬೇತಿ ಶಿಬಿರದಲ್ಲಿ ಕಠಿಣ ಅಭ್ಯಾಸ ನಡೆಸಿದ ಐವರು ಯುವಕರು ದೇಶದ ವಿವಿಧ ರಕ್ಷಣಾ ಪಡೆಗಳಿಗೆ ಆಯ್ಕೆಯಾಗುವ ಮೂಲಕ ಜಿಲ್ಲೆಗೆ ಕೀರ್ತಿ ತಂದಿದ್ದಾರೆ. ತರಬೇತುದಾರರಾದ ಪ್ರಕಾಶ್ ರೇವಣಕರ್ ಅವರ ಮಾರ್ಗದರ್ಶನದಲ್ಲಿ ಪಳಗಿದ ಮಂಜುನಾಥ್ ಲಕ್ಷ್ಮಣ್ ಬಳ್ಳಾರಿ, ಈರೇಶ್ ಹನುಮಂತ್ ಗಾಜಿ ಹಾಗೂ ವಿಘ್ನೇಶ್ ಚಂದ್ರಕಾಂತ್ ಗೌಡ ಅವರು ಭಾರತೀಯ ಸೇನೆಯ ‘ಅಗ್ನಿವೀರ್’ ಯೋಜನೆಗೆ ಆಯ್ಕೆಯಾಗಿದ್ದಾರೆ. ಇವರಲ್ಲಿ ಮಂಜುನಾಥ್ ಜೂನ್ 20 ರಂದು ನಾಸಿಕ್ನಲ್ಲೂ, ಈರೇಶ್ ಜೂನ್ 22 ರಂದು ಹೈದರಾಬಾದ್ನಲ್ಲೂ ಹಾಗೂ ವಿಘ್ನೇಶ್ ಗೌಡ ಜೂನ್ 25 ರಂದು ಮದ್ರಾಸ್ನಲ್ಲಿರುವ ಆರ್ಮಿ ಕ್ಯಾಂಪ್ಗಳಿಗೆ ಸೇರ್ಪಡೆಗೊಳ್ಳಲಿದ್ದಾರೆ.
ಕೇವಲ ಅಗ್ನಿವೀರ್ ಮಾತ್ರವಲ್ಲದೆ, ಇದೇ ಮೈದಾನದಲ್ಲಿ ತರಬೇತಿ ಪಡೆದ ನಾಗರಾಜ್ ಗದಗ ಅವರು ಬಿಎಸ್ಎಫ್ (ಗಡಿ ಭದ್ರತಾ ಪಡೆ) ಹುದ್ದೆಗೆ ಹಾಗೂ ಆರ್.ಡಿ. ಮನೋಹರ್ ಅವರು ಅಸ್ಸಾಂ ರೈಫಲ್ಸ್ ಪಡೆಗೆ ಆಯ್ಕೆಯಾಗಿ ಸಾಧನೆ ಮಾಡಿದ್ದಾರೆ. ಪ್ರಕಾಶ್ ರೇವಣಕರ್ ಅವರ ನಿರಂತರ ಪರಿಶ್ರಮದಿಂದಾಗಿ ಈ ಹಿಂದೆ ನೂರಾರು ಕ್ರೀಡಾಪಟುಗಳು ಉನ್ನತ ಮಟ್ಟಕ್ಕೇರಿದ್ದಲ್ಲದೆ, ಭೂಸೇನೆ, ವಾಯುಸೇನೆ, ನೌಕಾಪಡೆ, ನೌಕಾ ಪೊಲೀಸ್ ಕೇಂದ್ರದ ಕಾನ್ಸ್ಟೇಬಲ್ ಹಾಗೂ ಅರಣ್ಯ ಇಲಾಖೆಯ ವಿವಿಧ ಹುದ್ದೆಗಳಿಗೆ ದೈಹಿಕ ತರಬೇತಿ ಪಡೆದು ಯಶಸ್ವಿಯಾಗಿ ದೇಶಸೇವೆಗೆ ಸೇರ್ಪಡೆಗೊಂಡಿದ್ದಾರೆ.
ದೇಶದ ರಕ್ಷಣಾ ಪಡೆ ಹಾಗೂ ವಿವಿಧ ಸರ್ಕಾರಿ ಇಲಾಖೆಗಳಿಗೆ ಸೇರಬಯಸುವ ಯುವಕ-ಯುವತಿಯರಿಗಾಗಿ ಮಾಲಾದೇವಿ ಮೈದಾನದಲ್ಲಿ ಪ್ರತಿದಿನ ಬೆಳಿಗ್ಗೆ 6:15 ಕ್ಕೆ ಮತ್ತು ಸಂಜೆ 5:00 ಗಂಟೆಗೆ ಈ ದೈಹಿಕ ತರಬೇತಿ ಶಿಬಿರವನ್ನು ಸಂಪೂರ್ಣ ಉಚಿತವಾಗಿ ನಡೆಸಲಾಗುತ್ತಿದೆ. ಉದ್ಯೋಗದ ಕನಸು ಹೊತ್ತಿರುವ ಕಾರವಾರದ ಆಸಕ್ತ ಯುವಕ ಹಾಗೂ ಯುವತಿಯರು ಯಾವುದೇ ಶುಲ್ಕವಿಲ್ಲದ ಈ ಅತ್ಯುತ್ತಮ ತರಬೇತಿ ಶಿಬಿರದ ಸದುಪಯೋಗವನ್ನು ಪಡೆದುಕೊಂಡು ತಮ್ಮ ಭವಿಷ್ಯವನ್ನು ರೂಪಿಸಿಕೊಳ್ಳಬೇಕು ಎಂದು ತರಬೇತುದಾರರಾದ ಪ್ರಕಾಶ್ ರೇವಣಕರ್ ಈ ಮೂಲಕ ಪ್ರೀತಿಯಿಂದ ಮನವಿ ಮಾಡಿದ್ದಾರೆ.
