ಇದು ದೇಶದ ಹೆಮ್ಮಯ ಸ್ವದೇಶಿ ಜಲಾಂತರ್ಗಾಮಿ
ಭಾರತೀಯ ನೌಕಾಪಡೆಯ ಕರಾವಳಿ ಭದ್ರತಾ ಸಾಮರ್ಥ್ಯಕ್ಕೆ ಮತ್ತೊಂದು ಪ್ರಮುಖ ಬಲ ಬಂದಿದ್ದು, ಕಾರವಾರದ ನೌಕಾ ನೆಲೆಯಲ್ಲಿ ‘ಐಎನ್ಎಸ್ ಮಾಲ್ವಣ್’ ಯುದ್ಧನೌಕೆಯನ್ನು ಅಧಿಕೃತವಾಗಿ ಸೇವೆಗೆ ಬುಧವಾರ ಅಧೀಕೃವಾತವಾಗಿ ಸೇರ್ಪಡೆ ಆಗಲಿದೆ
‘ಮಾಹೆ’ ಶ್ರೇಣಿಯ ಜಲಾಂತರ್ಗಾಮಿ ವಿರೋಧಿ ಆಳವಿಲ್ಲದ ನೀರಿನ ಯುದ್ಧನೌಕೆ (ASW-SWC) ಯೋಜನೆಯಡಿ ನಿರ್ಮಾಣಗೊಂಡಿರುವ ಎರಡನೇ ಹಡಗು ಇದಾಗಿದೆ. ಕೊಚ್ಚಿನ್ ಶಿಪ್ಯಾರ್ಡ್ ಲಿಮಿಟೆಡ್ ಇದನ್ನು ವಿನ್ಯಾಸಗೊಳಿಸಿ ನಿರ್ಮಿಸಿದ್ದು, ‘ಆತ್ಮನಿರ್ಭರ ಭಾರತ’ ಕಲ್ಪನೆಯಡಿ ರಕ್ಷಣಾ ಉತ್ಪಾದನೆಯಲ್ಲಿ ದೇಶ ಸಾಧಿಸುತ್ತಿರುವ ಸ್ವಾವಲಂಬನೆಗೆ ಇದು ಅತ್ಯುತ್ತಮ ನಿದರ್ಶನವಾಗಿದೆ. ಶೇಕಡಾ 80ಕ್ಕಿಂತಲೂ ಹೆಚ್ಚು ಸ್ವದೇಶಿ ಬಿಡಿಭಾಗಗಳನ್ನು ಹೊಂದಿರುವ ಈ ಹಡಗಿನ ಅಭಿವೃದ್ಧಿಯಲ್ಲಿ ದೇಶದ ಪ್ರಮುಖ ರಕ್ಷಣಾ ಸಂಸ್ಥೆಗಳು ಹಾಗೂ ಹಲವು ಸಣ್ಣ ಮತ್ತು ಮಧ್ಯಮ ಪ್ರಮಾಣದ ಉದ್ಯಮಗಳು (MSME) ಭಾಗವಹಿಸಿವೆ.
ಮಹಾರಾಷ್ಟ್ರದ ಐತಿಹಾಸಿಕ ‘ಮಾಲ್ವಣ್’ ಪಟ್ಟಣದ ಹೆಸರನ್ನಿಡಲಾಗಿರುವ ಈ ಹಡಗು, ಭಾರತದ ಸಾಗರ ಪರಂಪರೆ ಹಾಗೂ ಛತ್ರಪತಿ ಶಿವಾಜಿ ಮಹಾರಾಜರ ಶೌರ್ಯವನ್ನು ಪ್ರತಿನಿಧಿಸುತ್ತದೆ. ಈ ಯುದ್ಧನೌಕೆಯ ಲಾಂಛನದಲ್ಲಿ ‘ಬಾಘ್ ನಖಾ’ (ಹುಲಿಯ ಉಗುರು) ಚಿಹ್ನೆಯಿದ್ದು, ಅದು ಗೌಪ್ಯತೆ, ಚುರುಕುತನ ಮತ್ತು ಸಾಹಸದ ಸಂಕೇತವಾಗಿದೆ. 78.8 ಮೀಟರ್ ಉದ್ದ ಹಾಗೂ 1150 ಟನ್ ತೂಕ ಸಾಮರ್ಥ್ಯದ ಈ ಹಡಗು, ಮೂರು ಡೀಸೆಲ್ ಎಂಜಿನ್ ಆಧಾರಿತ ವಾಟರ್-ಜೆಟ್ ಚಾಲನಾ ವ್ಯವಸ್ಥೆಯನ್ನು ಹೊಂದಿದೆ.
ಈ ವಿಶೇಷ ವಿನ್ಯಾಸವು ಹಡಗಿಗೆ ಹೆಚ್ಚಿನ ವೇಗ, ಸುಲಭವಾಗಿ ದಿಕ್ಕು ಬದಲಿಸುವ ಚುರುಕುತನ ಮತ್ತು ಅತ್ಯಂತ ಕಡಿಮೆ ಶಬ್ದದ ಕಾರ್ಯಾಚರಣೆಯ ಸಾಮರ್ಥ್ಯವನ್ನು ನೀಡುತ್ತದೆ. ಹೀಗಾಗಿ, ಕರಾವಳಿಯ ಆಳವಿಲ್ಲದ ನೀರಿನ ಪ್ರದೇಶಗಳಲ್ಲಿ ಜಲಾಂತರ್ಗಾಮಿ ವಿರೋಧಿ ಕಾರ್ಯಾಚರಣೆಗಳನ್ನು ನಡೆಸಲು ಇದು ಅತ್ಯಂತ ಸೂಕ್ತವಾಗಿದೆ. ತಾಂತ್ರಿಕವಾಗಿ ಹಾಗೂ ಶಸ್ತ್ರಾಸ್ತ್ರಗಳ ವಿಷಯದಲ್ಲೂ ಐಎನ್ಎಸ್ ಮಾಲ್ವಣ್ ಅತ್ಯಾಧುನಿಕವಾಗಿದೆ. ಇದು 30 ಎಂಎಂ ನೌಕಾ ಬೆಂಬಲ ಗನ್, ಹಗುರವಾದ ಟಾರ್ಪಿಡೊ ಉಡಾವಣಾ ವ್ಯವಸ್ಥೆ, ಸ್ವದೇಶಿ ರಾಕೆಟ್ ಲಾಂಚರ್ಗಳು, ‘ಅಭಯ’ ಹಲ್-ಮೌಂಟೆಡ್ ಸೋನಾರ್ ಹಾಗೂ ಟಾರ್ಪಿಡೊಗಳಿಂದ ರಕ್ಷಣೆ ನೀಡುವ ‘ಮಾರೀಚ್’ ಡಿಕಾಯ್ ವ್ಯವಸ್ಥೆಗಳನ್ನು ಒಳಗೊಂಡಿದೆ.
ಬಿಇಎಲ್ ಮತ್ತು ವೆಸ್ಸಿ (WESEE) ಸಂಸ್ಥೆಗಳು ಜಂಟಿಯಾಗಿ ಅಭಿವೃದ್ಧಿಪಡಿಸಿರುವ ‘ಯುದ್ಧ ನಿರ್ವಹಣಾ ವ್ಯವಸ್ಥೆ’ (CMS) ಹಡಗಿನ ಸಂವೇದಕಗಳು ಮತ್ತು ಶಸ್ತ್ರಾಸ್ತ್ರಗಳನ್ನು ನಿಯಂತ್ರಿಸಿ ಎದುರಾಳಿಗಳ ಬೆದರಿಕೆಗೆ ತಕ್ಷಣ ಸ್ಪಂದಿಸಲು ನೆರವಾಗುತ್ತದೆ. ಇವುಗಳ ಜೊತೆಗೆ, ವಿದ್ಯುನ್ಮಾನ ಯುದ್ಧ ಸಾಮರ್ಥ್ಯಕ್ಕಾಗಿ ‘ವರುಣ’ ಮತ್ತು ‘ನಯನ್’ ವ್ಯವಸ್ಥೆಗಳು ಹಾಗೂ ಇಡೀ ಹಡಗಿನ ಕಾರ್ಯಾಚರಣೆಯನ್ನು ಡಿಜಿಟಲ್ ರೂಪದಲ್ಲಿ ನಿರ್ವಹಿಸಲು ‘ಸಮಗ್ರ ವೇದಿಕೆ ನಿರ್ವಹಣಾ ವ್ಯವಸ್ಥೆ’ (IPMS) ಯನ್ನು ಅಳವಡಿಸಲಾಗಿದೆ. ಒಟ್ಟಿನಲ್ಲಿ, ಐಎನ್ಎಸ್ ಮಾಲ್ವಣ್ನ ಸೇರ್ಪಡೆಯು ಭಾರತದ ಕರಾವಳಿ ಕಣ್ಗಾವಲು ಪಡೆಯನ್ನು ಬಲಪಡಿಸುವುದಲ್ಲದೆ, ಭಾರತದ ಹಡಗು ನಿರ್ಮಾಣ ಕ್ಷೇತ್ರದ ತಾಂತ್ರಿಕ ಪ್ರಗತಿಯನ್ನು ಜಗತ್ತಿಗೆ ಸಾರಿದೆ.
