ಹಳಿಯಾಳ ಪೊಲೀಸ್ ಠಾಣೆಯಲ್ಲಿನ ಪ್ರಮುಖ ಹುದ್ದೆ, ಹಣದ ವ್ಯವಹಾರ ಹಾಗೂ ಮಾಸಿಕ ವಸೂಲಿ ಕುರಿತು ನಡೆದಿದೆ ಎನ್ನಲಾದ ಸಂಭಾಷಣೆಯೊಂದು ಆಡಿಯೋ ರೂಪದಲ್ಲಿ ಹೊರಬಿದ್ದು ವೈರಲ್ ಆದ ಕೆಲವೇ ದಿನಗಳಲ್ಲಿ ಪೊಲೀಸ್ ಇಲಾಖೆ ಕಠಿಣ ಕ್ರಮಕ್ಕೆ ಮುಂದಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಪೊಲೀಸ್ ಉಪನಿರೀಕ್ಷಕರನ್ನು ಅಮಾನತುಗೊಳಿಸಿರುವುದು ಉತ್ತರ ಕನ್ನಡ ಪೊಲೀಸ್ ವಲಯದಲ್ಲಿ ಭಾರೀ ಸಂಚಲನ ಮೂಡಿಸಿದೆ.
ಹಳಿಯಾಳ ಪೊಲೀಸ್ ಠಾಣೆಯ ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ಪಿಎಸ್ಐ ಕಿರಣ್ ಪಾಟೀಲ್, ಅಪರಾಧ ವಿಭಾಗದ ಪಿಎಸ್ಐ ಕೃಷ್ಣ ಹಾಗೂ ಈ ಹಿಂದೆ ಹಳಿಯಾಳದಲ್ಲಿ ಕರ್ತವ್ಯ ನಿರ್ವಹಿಸಿದ್ದ ಪಿಎಸ್ಐ ವಿನೋದ್ ರೆಡ್ಡಿ ಅಮಾನತುಗೊಂಡ ಅಧಿಕಾರಿಗಳಾಗಿದ್ದಾರೆ ಎಂದು ತಿಳಿದುಬಂದಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದ ಆಡಿಯೋದಲ್ಲಿ ಪೊಲೀಸ್ ಠಾಣೆಯ ಪ್ರಮುಖ ಹುದ್ದೆಯ ಪೋಸ್ಟಿಂಗ್ ವಿಚಾರವಾಗಿ ಹಣದ ಮಾತುಕತೆ ನಡೆದಿರುವ ಆರೋಪ ಕೇಳಿಬಂದಿತ್ತು. ಇದಲ್ಲದೆ ಠಾಣೆಯಿಂದ ಮಾಸಿಕವಾಗಿ ಹಣ ನೀಡುವ ವಿಚಾರ ಹಾಗೂ ಮೇಲಧಿಕಾರಿಗಳಿಗೆ ಹಣ ತಲುಪಿಸುವ ಕುರಿತು ಚರ್ಚೆ ನಡೆದಿದೆ ಎಂಬ ಆರೋಪವೂ ಆಡಿಯೋ ವೈರಲ್ ಆದ ಬಳಿಕ ಕೇಳಿಬಂದಿತ್ತು.
ಆಡಿಯೋ ಸಾರ್ವಜನಿಕ ವಲಯಕ್ಕೆ ಬಂದ ತಕ್ಷಣ ಪ್ರಕರಣ ಕೇವಲ ಪೊಲೀಸ್ ಇಲಾಖೆಯೊಳಗಿನ ವಿಚಾರವಾಗಿ ಉಳಿಯಲಿಲ್ಲ. ಜೆಡಿಎಸ್ ಕೂಡ ತನ್ನ ಅಧಿಕೃತ ಸಾಮಾಜಿಕ ಜಾಲತಾಣದಲ್ಲಿ ಆಡಿಯೋ ಹಂಚಿಕೊಂಡು ಗಂಭೀರ ಆರೋಪ ಮಾಡಿತ್ತು. ಪರಿಣಾಮವಾಗಿ ಪೋಸ್ಟಿಂಗ್ ಮತ್ತು ಹಣದ ವ್ಯವಹಾರದ ಆರೋಪ ಜಿಲ್ಲೆಯ ರಾಜಕೀಯ ಹಾಗೂ ಪೊಲೀಸ್ ವಲಯದಲ್ಲಿ ತೀವ್ರ ಚರ್ಚೆಗೆ ಕಾರಣವಾಯಿತು.
ವಿವಾದ ತೀವ್ರಗೊಳ್ಳುತ್ತಿದ್ದಂತೆ ಉತ್ತರ ಕನ್ನಡ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ದೀಪನ್ ಎಂ.ಎನ್. ಪ್ರಕರಣದ ತನಿಖೆಗೆ ಆದೇಶಿಸಿದ್ದರು. ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಕೃಷ್ಣಮೂರ್ತಿ ಅವರ ನೇತೃತ್ವದಲ್ಲಿ ತನಿಖೆ ನಡೆಸಲಾಗಿದ್ದು, ತನಿಖೆಯ ಬೆಳವಣಿಗೆಯ ಬೆನ್ನಲ್ಲೇ ಮೂವರು ಅಧಿಕಾರಿಗಳ ವಿರುದ್ಧ ಅಮಾನತು ಕ್ರಮ ಜರುಗಿದೆ ಎಂದು ಮೂಲಗಳು ತಿಳಿಸಿವೆ.
ಆದರೆ ಅಮಾನತು ಕ್ರಮದೊಂದಿಗೆ ಪ್ರಕರಣ ಮುಕ್ತಾಯವಾಗಿಲ್ಲ. ವೈರಲ್ ಆಡಿಯೋದಲ್ಲಿನ ಧ್ವನಿಗಳು ನಿಜವಾಗಿಯೂ ಯಾರಿಗೆ ಸೇರಿವೆ, ಸಂಭಾಷಣೆ ಯಾವ ಸಂದರ್ಭದಲ್ಲಿ ನಡೆದಿದೆ ಹಾಗೂ ಅದರಲ್ಲಿ ಕೇಳಿಬಂದ ಹಣದ ಆರೋಪಗಳಿಗೆ ಎಷ್ಟು ಸತ್ಯಾಂಶವಿದೆ ಎಂಬ ಪ್ರಶ್ನೆಗಳಿಗೆ ಮುಂದಿನ ತನಿಖೆಯೇ ಉತ್ತರ ನೀಡಬೇಕಿದೆ.
ಇದರ ನಡುವೆ, ಖಾಸಗಿ ಮಾತುಕತೆ ಎನ್ನಲಾದ ಆಡಿಯೋ ಹೊರಬಂದಿದ್ದು ಹೇಗೆ ಎಂಬ ಪ್ರಶ್ನೆಯೂ ಕುತೂಹಲ ಕೆರಳಿಸಿದೆ. ಆಡಿಯೋ ದಾಖಲಿಸಿದವರು ಯಾರು, ಅದನ್ನು ಸಾಮಾಜಿಕ ಜಾಲತಾಣಗಳಿಗೆ ತಲುಪಿಸಿದವರು ಯಾರು ಮತ್ತು ವೈರಲ್ ಮಾಡುವ ಹಿಂದೆ ಯಾವುದೇ ಉದ್ದೇಶವಿತ್ತೇ ಎಂಬ ಅನುಮಾನಗಳೂ ಈಗ ಚರ್ಚೆಯಲ್ಲಿವೆ.
ಒಂದು ಆಡಿಯೋದಿಂದ ಆರಂಭವಾದ ವಿವಾದ ಇದೀಗ ಮೂವರು ಪಿಎಸ್ಐಗಳ ಅಮಾನತಿನವರೆಗೆ ತಲುಪಿದೆ. ಮುಂದಿನ ತನಿಖೆಯಲ್ಲಿ ಹಳಿಯಾಳ ಪೊಲೀಸ್ ಠಾಣೆಯ ಈ ‘ಪೋಸ್ಟಿಂಗ್ ಡೀಲ್’ ಆರೋಪ ಪ್ರಕರಣ ಇನ್ನಷ್ಟು ದೊಡ್ಡ ತಿರುವು ಪಡೆಯುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ.
