ಕಾರವಾರ: ಫ್ಲೈಓವರ್ ಕೆಳಭಾಗದಲ್ಲಿದ್ದ ಗಿಡಗಳ ನರ್ಸರಿ ತೆರವುಗೊಳಿಸುವ ಕಾರ್ಯಕ್ಕೆ ನಗರಸಭೆ ಮುಂದಾಗುತ್ತಿದ್ದಂತೆ, ಅಲ್ಲಿ ಮಾರಾಟಕ್ಕಿಟ್ಟಿದ್ದ ಗಿಡಗಳನ್ನು ಕೆಲವರು ತಮ್ಮ ವಾಹನ ಹಾಗೂ ಚೀಲಗಳಿಗೆ ತುಂಬಿಕೊಂಡು ಹೋಗಿರುವ ಘಟನೆ ಗುರುವಾರ ನಡೆದಿದೆ.
ತೆರವು ಕಾರ್ಯದ ನೆಪದಲ್ಲಿ ಗಿಡಗಳನ್ನು ರಕ್ಷಿಸುವ ಬದಲು, ಸ್ಥಳದಲ್ಲಿದ್ದ ಗಿಡಗಳು ಸಾರ್ವಜನಿಕರ ಪಾಲಾಗಿದ್ದು ಇದೀಗ ನಗರದಲ್ಲಿ ಚರ್ಚೆಗೆ ಕಾರಣವಾಗಿದೆ.
ಕಾರವಾರ ನಗರದ ಫ್ಲೈಓವರ್ ಕೆಳಭಾಗದಲ್ಲಿ ವ್ಯಕ್ತಿಯೊಬ್ಬರು ಗಿಡಗಳನ್ನು ಮಾರಾಟ ಮಾಡುತ್ತಿದ್ದರು. ಈ ಸ್ಥಳಕ್ಕೆ ಸಂಬಂಧಿಸಿದಂತೆ ಬುಧವಾರ ಪರಿಶೀಲನೆ ನಡೆಸಿದ್ದ ಲೋಕಾಯುಕ್ತರು, ಅಲ್ಲಿನ ನರ್ಸರಿಯನ್ನು ಸ್ಥಳಾಂತರಿಸುವಂತೆ ನಗರಸಭೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದರು. ಅದರಂತೆ ಗುರುವಾರ ನಗರಸಭೆ ಸಿಬ್ಬಂದಿ ಹಾಗೂ ಅಧಿಕಾರಿಗಳು ಸ್ಥಳಕ್ಕೆ ತೆರಳಿ ಗಿಡಗಳನ್ನು ವಾಹನದಲ್ಲಿ ತುಂಬಿಕೊಂಡು ಬೇರೆಡೆಗೆ ಸ್ಥಳಾಂತರಿಸುವ ಕಾರ್ಯ ಆರಂಭಿಸಿದರು.
ಆದರೆ ನಗರಸಭೆಯವರು ಗಿಡಗಳನ್ನು ತೆರವುಗೊಳಿಸುತ್ತಿದ್ದ ಸಂದರ್ಭವೇ ಕೆಲವರಿಗೆ ‘ಅವಕಾಶ’ವಾಗಿ ಪರಿಣಮಿಸಿತು. ಗಿಡ ಮಾರಾಟ ಮಾಡುತ್ತಿದ್ದ ವ್ಯಕ್ತಿ ಸ್ಥಳದಲ್ಲಿ ಇಲ್ಲದಿರುವುದನ್ನು ಗಮನಿಸಿದ ಕೆಲವರು, ಮಾರಾಟಕ್ಕೆ ಇಡಲಾಗಿದ್ದ ಗಿಡಗಳನ್ನು ತಮಗೆ ಬೇಕಾದಂತೆ ತೆಗೆದುಕೊಂಡು ಹೋಗಲು ಆರಂಭಿಸಿದರು. ಕೆಲವರು ವಾಹನಗಳಲ್ಲಿ ಗಿಡಗಳನ್ನು ತುಂಬಿಕೊಂಡರೆ, ಇನ್ನೂ ಕೆಲವರು ಚೀಲಗಳಲ್ಲಿ ಹಾಕಿಕೊಂಡು ತೆರಳಿದರು ಎನ್ನಲಾಗಿದೆ.
ತೆರವುಗೊಳಿಸುವ ಕಾರ್ಯ ನಗರಸಭೆಯದ್ದಾಗಿದ್ದರೂ, ಗಿಡಗಳನ್ನು ಕೊಂಡೊಯ್ಯುವ ಹಕ್ಕು ಯಾರಿಗೂ ನೀಡಲಾಗಿರಲಿಲ್ಲ. ಆದರೂ ಸ್ಥಳದಲ್ಲಿ ಗಿಡ ಮಾರಾಟ ಮಾಡುವವ ಇಲ್ಲದಿರುವುದನ್ನು ‘ಸಿಕ್ಕಿದ್ದೇ ಸೀರುಂಡೆ’ ಎಂಬಂತೆ ಬಳಸಿಕೊಂಡ ಕೆಲವರು ಗಿಡಗಳನ್ನು ಕೊಂಡೊಯ್ದಿರುವುದು ಸಾರ್ವಜನಿಕರ ನಡೆಗೆ ಟೀಕೆಗೆ ಕಾರಣವಾಗಿದೆ.
ಗಿಡಗಳನ್ನು ಮಾರಾಟ ಮಾಡಿ ಜೀವನ ನಡೆಸುತ್ತಿದ್ದ ವ್ಯಕ್ತಿಗೆ ಸೇರಿದ ಸಸಿಗಳು ಯಾವುದೇ ಅನುಮತಿಯಿಲ್ಲದೆ ಸಾರ್ವಜನಿಕರ ಪಾಲಾಗಿರುವುದು ಆತನಿಗೆ ನಷ್ಟ ಉಂಟುಮಾಡಿದೆ. ನಗರಸಭೆ ಕ್ರಮದ ವೇಳೆ ಗಿಡಗಳನ್ನು ಸುರಕ್ಷಿತವಾಗಿ ಸ್ಥಳಾಂತರಿಸುವ ಅಥವಾ ಅವುಗಳ ಮಾಲೀಕತ್ವವನ್ನು ಪರಿಶೀಲಿಸುವ ಬದಲು, ಕೆಲವರು ತಮ್ಮ ಸ್ವಂತ ವಸ್ತುವಿನಂತೆ ತೆಗೆದುಕೊಂಡು ಹೋಗಿರುವುದು ಸಾಮಾಜಿಕ ಜವಾಬ್ದಾರಿಯ ಪ್ರಶ್ನೆಯನ್ನೂ ಹುಟ್ಟುಹಾಕಿದೆ.
ಲೋಕಾಯುಕ್ತರ ಸೂಚನೆಯಂತೆ ಅಕ್ರಮ ಅಥವಾ ಅನಧಿಕೃತವಾಗಿ ಬಳಕೆಯಾಗುತ್ತಿದ್ದ ಜಾಗವನ್ನು ತೆರವುಗೊಳಿಸುವುದು ಒಂದು ವಿಚಾರವಾದರೆ, ಅಲ್ಲಿ ವ್ಯಾಪಾರಕ್ಕಾಗಿ ಇಡಲಾಗಿದ್ದ ವಸ್ತುಗಳನ್ನು ಯಾರೇ ಆಗಲಿ ತಮ್ಮದಾಗಿಸಿಕೊಂಡು ಹೋಗುವುದು ಮತ್ತೊಂದು ವಿಚಾರ. ಸರ್ಕಾರಿ ಜಾಗ ತೆರವು ಹೆಸರಿನಲ್ಲಿ ಖಾಸಗಿ ವ್ಯಕ್ತಿಯ ಗಿಡಗಳೇ ಸಾರ್ವಜನಿಕರಿಗೆ ‘ಉಚಿತ ವಿತರಣೆ’ಯಾದಂತಾಗಿದೆ ಎಂಬ ವ್ಯಂಗ್ಯ ಮಾತುಗಳು ಇದೀಗ ಕೇಳಿಬರುತ್ತಿವೆ.
ನಗರಸಭೆ ಗಿಡಗಳನ್ನು ಸ್ಥಳಾಂತರಿಸಲು ಮುಂದಾದಾಗ ಉಂಟಾದ ಈ ಬೆಳವಣಿಗೆ ಇದೀಗ ಸ್ಥಳೀಯರ ಗಮನ ಸೆಳೆದಿದ್ದು, ಗಿಡಗಳನ್ನು ಕೊಂಡೊಯ್ದವರ ವಿರುದ್ಧ ಯಾವುದೇ ಕ್ರಮ ಕೈಗೊಳ್ಳಲಾಗುತ್ತದೆಯೇ ಎಂಬ ಪ್ರಶ್ನೆಯೂ ಎದುರಾಗಿದೆ.
